Mashi no Mashi

引言

作為Wagyumafia集團旗下嘅拉麵餐廳，Mashi No Mashi繼承咗同集團其他餐廳嘅性格同特色，食物選擇亦同集團其他餐廳一樣以和牛作為主題，主要有沾麵，和牛丼同和牛餃子。餐廳使用咗簡單嘅工業風設計，以灰色作為主調，冇任何太過花巧嘅裝修，只有12個吧位。店員每一次上菜嘅時候都會擺出佢地嘅招牌動作，比客人打卡分享。

特製和牛沾面 ($150/150g麵底) (可選冷麵/熱麵)

以餐廳嘅主打嚟講，我地對Mashi No Mashi嘅沾麵非常失望。本來以為個沾汁會係和牛湯底，但一食落去竟然一啲和牛味都冇。湯底以魚介味為主，味道偏鹹，感覺上同其他大型連鎖沾麵鋪頭既沾汁差唔多。細細杯嘅沾汁入面主要係大蔥同牛肉粒，味道同口感層次都非常一般。配菜方面就有椰菜，紫菜，蛋，筍同埋三塊和牛。紫菜唔係特別脆，筍嘅味道唔係特別重，亦都冇乜渣。流心蛋嘅蛋黃偏熟，上菜嘅時候已經見到一部分嘅蛋黃熟曬，味道方面醬油汁嘅味道亦都唔夠。

而主打嘅和牛片亦都令人非常失望。完全食唔出和牛特有既澎湃油脂香味，口感方面亦都一定唔係入口即化。食落明顯感覺到有筋, 就連將塊牛肉一分為二都有難度。調味方面都做得唔好，鹹味唔夠，唔點湯食嘅話會有啲似食緊一塊牛肉香口膠。最後個椰菜就係同你屋企用水住完唔落鹽嘅菜一樣，完全同碗麵唔夾，寧願唔要。碗麵唯一唔錯既地方就係個麵底，口感偏硬，粗幼度適中，掛湯能力都唔錯。不過因為麵底嘅喜好因人而異，餐廳冇得選擇麵嘅口感都有少少可惜。

和牛丼 ($180)

和牛丼嘅整體份量比較細。丼飯入面有少少和牛碎同油，上面就鋪滿一塊塊和牛，中間一個橙紅色嘅蛋黃，賣相比起網上睇到嘅無咁吸引。值得一讚嘅係米飯嘅口感非常好，粒粒分明，濕度掌握都非常好。相比下，和牛就顯得非常遜色。丼飯上面嘅和牛有用火槍輕輕燒灼過，不過就算經過燒灼亦都仍然係同麵上面既和牛一樣，缺乏和牛獨有既甘甜同油香。口感方面，整體偏乾，唔會有任何肉汁或者油分爆開，咬落偏韌，又係做唔到入口即化嘅感覺。牛肉既調味都未做到位，毫末層次感，就連基本既鹹味都係唔夠既。

總結

整體黎講Mashi No Mashi食物完全唔值佢嘅價錢。作為一個以和牛為主題既餐廳，冇一樣和牛既食物係令人咁到驚艷。入口即溶，油香，甘香，依啲大家對和牛既印象亦都完全係依到搵唔到。以一樣既價錢係其他拉麵鋪搵到既食物質素會比依到既出色。如果只以Wagyumafia集團嘅名聲及招牌嘅上菜動作嚟支撐間餐廳嘅話，相信Mashi No Mashi好快就會搞唔掂。

食物呈現 8/10

食物味道 5/10

環境 7/10

服務 7/10

性價比 3/10